لم اوذي أحد
بقلمي نرمين بهنسي
في ناس كتير في الدنيا عمرهم ما عرفوا يؤذوا حد… مش ضعف، لكن طيبة زيادة، وقلب بيخاف يكسّر خاطر أي إنسان.
أنا من النوع ده…
عمري ما جرحت حد عن قصد، ولا كنت سبب في دمعة لحد، بالعكس كنت دايمًا بحاول أكون السند، وأكون اللي يحتوي، وأكون اللي يعدّي للناس أوجاعهم من غير ما يحسّسوهم بأي تقصير.
لكن الحقيقة اللي اكتشفتها متأخر…
إن وأنا بحافظ عليهم… كنت بخسر نفسي.
كنت بسكت علشان ما أخسرش حد.
كنت أتنازل علشان ما يحصلش زعل.
كنت أبرر الغلط علشان ما أكره حد.
وكنت أتحمل فوق طاقتي علشان أعيش في سلام.
بس السلام اللي بييجي على حساب كرامتك… مش سلام.
والحفاظ على الناس اللي مش حاسين بيك… مش حب، ده استنزاف.
أصعب حاجة إنك تكون حنين لدرجة إنك تحارب نفسك علشان غيرك يفضل مرتاح.
تتعب علشان ما تتعبهمش.
وتتوجع علشان ما تزعّلهمش.
وتضحّي علشان ما يتقالش إنك اتغيرت.
لكن محدش قال إنك لازم تتحطم علشان تثبت إنك إنسان كويس.
مش غلط إنك تحافظ على الناس…
الغلط إنك تعمل ده لحد ما تضيّع نفسك.
اللي يحبك بجد… هيحافظ عليك زي ما بتحافظ عليه.
واللي يوجعك ويكمّل عادي… عمره ما كان يستحق كل اللي قدمته.
يمكن أنا ما أذيتش حد…
بس خلاص… مش هأذي نفسي تاني علشان أرضي حد.
